LAOAG CITY – Umabot iti 150 a soldado ti Guatemala ti simmangpet iti Haiti tapno tumulong a mangparmek kadagiti armed gangs.
Inaramid daytoy ti Guatemala kalpasan a naideklarar ti state of emergency iti Caribbean nation iti sumagmamano a bolan kabayatan ti pannakilablaban ti gobierno kadagiti kinadamsak nga ipatpatungpal dagiti armed gangs.
Naamoan nga adda dagiti puersa idiay Haiti tapno mapapigsa ti security mission a supsuportaran ti United Nations nga indauluan ti Kenya nga agpapan ita ket napaay a manglapped iti kumaro a kinaranggas.
Immunan a nangipatulod ti Kenya ti agarop 400 a police officers idi Hunyo ken Hulyo iti napalabas a tawen tapno tumulong a makiranget kadagiti gangs.
Maipalagip nga idi 2021, napapatay ni President Jovenel Moïse babaen kadagiti saan pay a nabigbig nga armado a lallaki iti Port-au-Prince no sadinno a sipud idi ket nabalkuten ti pagilian ti krisis iti ekonomiya, addan ti pannaka-kontrol ti pulitika ken ad-adda pay a nagbalin a naranggas dagiti armed gangs.
