LAOAG CITY – Kinumpirmaran ni Dr. Ma. Lourdez Otayza, ti Chief of Hospital ken Medical Center Chief II iti Mariano Marcos Memorial Hospital and Medical Center iti ciudad ti Batac a 1500 a doses ti nailatang iti nadakamat nga ospital.
Daytoy ket pakadagupan iti 2,446 a doses a simmangpet ditoy probinsya para kadagiti health care workers.
Segun kenni Otayza, 750 ti eksakto a bilang dagiti health care workers ti mabakunaan iti daytoy no sadinno a ti maikadwa a dose ket maawat da kalpasan ti 28 nga aldaw.
Saan met pay a masigurado ni Dr. Otayza no kaano a malpas ti vaccine rollout da para iti ummuna a shot ti bakuna.
Inadmitir met ni Dr. Otayza nga adda met dagiti saan a nagpirma a mabakunaan gapo ta adda ti sagsagabaen da a sakit.
Kabayatanna, saan met a nagpangadua a nagpabakuna ni Dr. Jose Orosa III, Chief of Medical Professional Staff ken daytoy ti kaunaan a nabakunaan iti nakadamat nga ospital.
Inlawlawag na nga inaramid da laeng ti parte da gapo ta no mabakunaan dagitoy ket maprotektaran da met dagiti pasyente da, ti komunidad pakairamanan ti pamilya na.
Kunana a kalpasan ti pannakabakuna na ket awan met dagiti narikrikna na a nakaro nga epekto ti bakuna, kasta pay a saan a nasakit no sadinno nga arig na ket saan na a nadlaw a naidutok kenkuanan ti bakuna.
Ginutigot na met ti publiko nga agpabakuna apaman a sumangpet ti bakuna para iti publiko ken saan a mabuteng iti daytoy gapp ta proteksyon daytoy manipud iti covid.
Mainaig iti daytoy, inpakaammo ni Mr. Jhey-ar Mangati, ti Healt Education ken Promotions Officer nga awan met dagiti nakarikna ti anyaman nga epekto ti nasao a bakuna.
