LAOAG CITY – Dumanon iti 150,000 a metriko tonelada ti bagas manipud iti buffer stock ti naikeddeng nga ibunong ti National Food Authority apaman a naan-anay nga ideklara ti Department of Agriculture ti national food security emergency.
Basar iti Department of Agriculture, target ti National Food Authority nga iruar ti dumanon iti 3 million 50-kilogram bags ti bagas iti uneg ti innem a bulan kadagiti lugar no sadinno a nangato ti presio ti bagas.
Plano ti National Food Authority a gumatang ti kanayon a suplay ti irik iti balor a P23 iti kada kilo inton sumaruno a bulan.
Daytoy ket maigeddan ti panawen ti panagapit a mangrugi iti katengngaan ti bulan ti Pebrero.
Kumpiansa ni National Food Authority Administrator Larry Lacson a makatulong ti panangiruarda ti stock ti bagas tapno maipababa ti presio ti bagas kadagiti tiendaan iti intero a pagilian.
Namandar ti National Food Authority a pagtalinaeden ti 15-day rice buffer stock nga aggapu met kadagiti apit dagiti lokal a mannalon.
