LAOAG CITY – Inabisoan ti Philippine Atmospheric Geophysical Astronomical Service Administration ti publiko nga ad-adu pay a danum ti inumen iti inaldaw gapu iti bumarbara a panawen.
Basar iti Philippine Atmospheric Geophysical Astronomical Service Administration, adda ti posibilidad a mairekord ita nga aldaw dagiti 16 a lugar ditoy pagilian ti delikado a lebel ti heat index wenno “dangerous heat index.”
Iti kaudian a monitoring ti Philippine Atmospheric Geophysical Astronomical Service Administration, manamnama a dumanon iti 42°C idiay Metro Manila bayat a ti kabaraan ket 45°C ti heat index idiay Roxas City, Capiz; 44°C idiay Puerto Princesa ken Aborlan, Palawan pakairamanan idiay Guiuan, Eastern Samar.
Dumanon iti 43°C ti posible a mapasaran idiay Dagupan City, Pangasinan ken Catarman Northern Samar; 42°C idiay Metro Manila ken Bacnotan, La Union; Aparri ken Tuguegarao idiay Cagayan; Sangley Point, Cavite; Ambulong, Tanauan Batangas; San Jose, Occidental Mindoro; Pili, Camarines Sur; Iloilo City ken Dumangas, Iloilo.
Ti dangerous heat index ket adda iti nagbaetan ti 42°C agingga 51°C a posible a mangitunda ti nakaro a bannog, heat cramps ken heat stroke iti maysa a tao.
Kabayatanna, naammoan a nasaysayaat nga agtalinaed iti nalinong a lugar, nakasuot ti komportable a bado ken ugalien ti kanayon a panaginum ti danum.
