LAOAG CITY – Addan ti 16 a municipyo ditoy probinsya a nalpasen a nagibunong ti Social Amelioration Package (SAP).
Daytoy ti inpakaammo ni Mr. Randy dela Rosa, Provincial Director ti Department of Interior and Local Government (DILG) ditoy probinsya.
Inbatad ni dela Rosa a dagiti municipyo a nakakompleton a nagibunong ti SAP ket iti ili ti Adams, Badoc, Banna, Burgos, Carasi, Currimao, Dingras, Dumalneg, Marcos, Nueva Era, Pagudpud, Piddig, Sarrat, Pasuquin, Solsona, ken Vintar.
Mangnamnama ni dela Rosa a dagiti pito a munisipyo ken ciudad a saan pay a nakalpas a nakaibunong ti SAP ket maileppas da sakbay wenno agingga iti MAyo 10 a deadline na.
Inlawlawag ni dela Rosa a ti rason no apay nga adda pay laeng dagiti lugar ditoy probinsya a saan a nakalpas a nagibunong ti SAP ket gapu iti kaado ti reklamo isut gapuna a binaliwan da ti nang-assess ken nangvalidate ti listaan ken no adda dagiti naisurat a rebbeng na a maikkan ti ayuda.
Malaksid iti daytoy, ti maysa pay a rason ket ti kaado dagiti pamilya a rumbeng a maivalidate kas koma ditoy ciudad ti Laoag.
