LAOAG CITY – Natay ti 16 nga indibidual gapu iti Russian drone ken missile attack idiay Ukraine.
Nasugatan ti 64 nga indibidual no sadinno a 14 ditoy ket ubbing kalpasan ti maibilang a deadliest Russian strikes iti laud a paset ti Ukraine sipod nangrugi ti gubat idi Pebrero 2022.
Naapektaran ti dua a dadduma pay a western regions a Lviv ken Ivano-Frankivsk pakairamanan ti tallo pay a distrito ti northern city ti Kharkiv a nakasugatan ti sumurok 30 a tattao.
Basar iti energy ministry ti Ukraine, napukawan ti suplay ti kuriente dagiti sumagmamano a rehion iti nasao a pagilian.
Inbatad ni Ukrainian President Volodymyr Zelensky, nangiwayat ti Russia ti sumurok 470 a drones ken 47 a missiles a nangibati ti nakaro a pannakadadael kadagiti lugar.
Nagballaag ni Zelensky a posible a ma-trapped dagiti tattao iti Ternopil gapu iti panangatake ti Russia.
Mainaig iti daytoy, inpakaammo ni Ihor Klymenko, Interior Minister a nadadael ti pasdek kangrunaanna iti nagbaetan ti maikatlo ken maika-siam a kadsaaran.
Naperdi dagiti energy facilities, transport ken civil infrastructure iti akin-laud a paset ti Ukraine.
Nadadael pay ti energy sector iti Ivano-Frankivsk region a nakasugatan ti tallo nga indibidual no sadinno a dua kadagitoy ket ubbing.
Kabayatanna, kuna ti mangidadaulo ti Lviv region a na-target met ti energy facility iti lugarda.
