LAOAG CITY – Natay ti 16 nga indibidual idinto a 18 ti nasugatan iti nakaam-ames nga aksidente ti pampasahero a bus idiay Indonesia kalpasan a naidungpar iti concrete barrier iti Java main island.
Basar iti imbestigasion dagiti otoridad, agturong koma iti siudad ti Yogyakarta ti bus manipud iti kabisera ti pagilian a Jakarta idi napasamak ti aksidente iti curved exit ti Krapyak toll road.
Iti inisyal nga imbestigasion, simmobra ti panaglikko ti bus kabayatan a napaspas ti taray daytoy isut gapuna a napukawan ti kontrol ti driver ken napigsa a naidungpar iti concrete barrier.
Gapu iti kinapigsa ti impact, sumagmamano a pasahero ti naipurwak ken naipit iti uneg ti bus.
Mainaig iti daytoy, innem a pasahero ti naideklarar a dead on the spot idinto a 10 ti naitaray kadagiti nagduduma nga ospital ngem saan a nagbayag ket pimmusay met laeng dagitoy gapu iti nakana a sugat a sinagabada.
Agtultuloy a matamtaming ti 18 a nasugatan, sumagmamano kadakuada ket adda iti kritikal a kondision.
Inbatad ni Budiono, hepe ti search and rescue team, sumagmamano a minuto ti napalabas sakbay a naan-anay a nakasangpet iti lugar dagiti pulis ken rescue personnel.
Insigida a nangiwayatda ti rescue operation ken nangipaay ti pakpakauna a panangagas kadagiti biktima ngem awanen ti naaramidanda kadagiti pasahero a natayen iti lugar ti insidente.
Kabayatanna, agtultuloy nga agpapaimbag iti ospital ti driver ti bus kalpasan a nagsagaba ti nakana a sugat.
Inrakurak dagiti otoridad a dumalan isuna iti drug test ken naun-uneg nga imbestigasion tapno maammoan no adda ti panaglabsing iti speed limit, pannakabaybay-a wenno dadduma pay a mabalin a namunganayan iti nasao nga aksidente.
