LAOAG CITY – Natay ti 16 nga indibidual ken tallo ti nasugatan kalpasan a nauram ti nursing home para kadagiti natataengan a residente iti amianan a paset ti Indonesia.
Nakaawat ti fire department ti report nga adda ti uram iti Damai retirement home iti siudad ti Manado, ti kabisera ti North Sulawesi province.
Inbatad ni Jimmy Rotinsulu, Fire and Rescue Agency Chief ti nasao a siudad, naruay a biktima ti nakita iti uneg kadagiti kuarto a kaaduan kadagitoy ket natataengan nga agin-inana kadayta a gundaway idi napasamak ti insidente.
Ikarkarigatan dagiti otoridad a bigbigen dagiti biktima ken inallukoyna dagiti pamilia dagiti biktima a kontaken ti ospital a nakaitarayan dagiti bangkay.
Mainaig iti daytoy, inpakaammo ni Steven Mokodompit, residente iti asideg ti nursing home a maysa isuna kadagiti timmulong a nangibakwit kadagiti sumagmamano nga indibidual nga adda iti nursing home.
Kunana a maur-uramen ti kusina iti nursing home idi nakadanon daytoy iti lugar no sadinno nga adda dagiti bimtak ken agpukpukkaw tapno agkiddaw ti tulong.
Inlawlawagna nga iti uneg laeng ti lima a minuto ket nabalkoten ti dakkel nga apoy ti nasao a pasdek.
Naammoan a saan a gagangay dagiti dadakkel nga uram a mapaspasamak idiay Indonesia.
Maipalagip nga iti nasapa a paset ita a bulan ket adda manen ti napasamak nga uram iti seven-storey office building iti kabisera ti Indonesia a Jakarta a nakatayan ti 22 a tattao.
