LAOAG CITY – Inbatad ni Department of Agriculture (DA) Secretary Francisco Tiu Laurel, Jr. nga umabot iti 17 monolithic dome cold storage facilities a naaramid idi 2022 ti substandard.
Iti panagbisita na idiay Bukidnon, kuna ni Laurel a saan na nga inpalubos ti pannakausar dagiti pasilidad gapo iti disenyo uray nakumpleton daytoy iti napalpalabas a tawen.
Kunana a dagiti nasao a pasilidad ket naaramid babaen iti dati DA administration.
Kunana a maysa kadagiti saan pay a nausar a pasilidad ket masarakan iti uneg ti compound ti Cagayan de Oro City Engineering Office iti Barangay Kauswagan, a nakumpleto idi March 2022.
Naamoan a ti kada monolithic dome cold storage facility ket agbalor iti agarop P20 million.
Mainaig iti daytoy, dagiti pasilidad ket nadesenyo tapno matulungan dagiti mannalon a maiyatiddog ti shelf life dagiti produkto da ken mailako da iti nainkalintegan a presyo.
