LAOAG CITY – Umabot iti 17 a pedaso ti heat sealed transparent sachet a naglaon ti maipagarop a shabu ti nakumpiskar dagiti kameng ti Philippine Drug Enforcement Agency (PDEA) iti inyuswat da a search warrant operation iti maysa a pagtaengan iti Barangay Malasin iti ili ti Bangui.
Daytoy ti inbatad ni Agent Harry Cariño, ti team leader ti PDEA ditoy probinsya.
Inlawlawag ni Cariño nga awan ti subject ti operasyon a ni Wilbert Laguatan idi napan da inserbi ti search warrant nga inparuk-at ni Acting Presiding Judge Felix Salvador iti Regional Trial Court Branch 19-Bangui, Ilocos Norte ngem intuloy da latta daytoy.
Naipalaon iti search warrant a biruken da dagiti ik-ikutan a maipagarop a shabu ni Laguatan ken dagiti paraphernalia iti pagtaengan ti subject.
Kuna na a ti nakumpiskar da a maipagarop a shabu ket agdagsen ti pito a gramo ken mapatta-patta nga agbalor ti 70 ribo a pisos.
Kinumpirmaran ni Cariño a ni Laguatan ket maibilang nga High Value Target iti Provincial Level no sadinno a karaman a pagop-operaran na ket iti ili ti Pagudpud, Burgos, Bangui, Pasuquin ken uray iti ili ti San Nicolas.
Inpakaammo ni Cariño nga agosto ita a tawen a nakaawat da ti impormasyon mainaig iti illegal nga aktibidad ni Laguatan.
Innayon na nga iti panag-validate da ket nakumpirmaran da a positibo ti naidanun kadakuada nga illegal nga aktibidad ni Laguatan.
Mainaig iti daytoy, kuna ni Cariño nga uray saanda a nadanun ni Laguatan iti balay da iti panagiyuswat da ti operasyon ket ituloy da latta a pilaan ti reklamo a panaglabsing ti Republic Act (RA) 9165 wenno ti Comprehensive Dangerous Drugs Act of 2002.
