LAOAG CITY – Inyuswat ti PNP-Dingras ti pannakatiliw kadagiti 17 a nagpapallot idiay Sitio San Vicente, Brgy. San Marcelino, Dingras Ilocos Norte.
Nabigbig dagiti suspek a da Enrico Lomboy a residente iti Brgy. Nagpatpatan, Solsona; Arnolfo Balisa, Amador Asuncion, Fortuna Ganal, Oscar Domrique, Robert Tomas, Dominador Ramos, Jose Caraang, Erwin Pascua, Anacalio Ramos, agpapada a residente ti Brgy. San Marcelino; Eric Baraiodan a taga Batac City.
Malaksid kadagitoy, natiliw pay da Alberto Akbang, Armando Singco, residente ti Brgy. Baresbes, Dingras; Domingo Cerol, Melchor Arnado a taga Brgy. Francisco Dingras; Isais Marcos, residente ti Brgy. Abucay, Piddig; ken Dexter Malceco residente ti Bgry. 56-A, Bacsil North, Laoag City.
Nakumpiskar dagiti otoridad dagiti 11 a para pallot a manok, maysa a box a naglaon ti 14 a tadi ken nagduduma paraphernalia.
Nagtalinaed met dagitoy iti kustudiyar ti PNP-Dingras ken manamnama a mapilaan ti kaso a Presidential Decree 449.
