LAOAG CITY – Aglemlemmengen ti 18 a nagpabigbig a dati a Marines ken “bagmen” ni dati a Congressman Zaldy Co gapu iti maipagarup a pangta iti seguridad dagitoy.
Inbatad ni Rey Valeros Jr., Secretary-General ti United People’s Initiative (UPI), maysa a grupo dagiti dati nga opisial ken kameng ti militar a sumupsuporta kadagiti dati a suldado, nakaawat ti pangta iti seguridad kadagiti 18 a dati a Marines.
Inlawlawagna a saan a nagatendar ti 18 a nagpabigbig a dati a miembro ti Philippine Marine Corps iti awarding ceremony idiay San Juan City no sadinno ket maipaayan koma dagitoy ti pammigbig gapu iti kinaturedda iti panangibutaktak ti maipagarup nga anomalya.
Kunana a maipagarup a saan met a nagatendar ni Army Colonel Audie Mongao a naikkat iti puesto kalpasan ti panangibabawi ti suporta ken ni Presidente Ferdinand Marcos Jr. ken ni dati a Marine Orly Guteza a nangakusar ken ni dati nga House Speaker Martin Romualdez nga inramanna iti anomalya ti flood control projects.
Inadmitir ni Valeros nga ipapaayanda ti security ken financial support ti 18 a dati a suldado iti kanito a rummuar dagitoy.
Iti baet nga aglemlemmeng, inpasigurado ni Valeros a nakasagana a sumango dagiti dati a suldado iti aniaman nga imbestigasion no bilang ituloy daytoy ti Senado, Kamara de Representantes wenno ti Office of Ombudsman.
