LAOAG CITY – Sumagmamano a serye ti panagatake ken panagbomba iti napasamak iti southwestern ti probinsya ti Balochistan idiay Pakistan a nakatayan ti 18 a sibilyan ken 15 a security service personnel.
Inpakaammo met ti security forces a nagresponde iti kinadamsak nga umabot iti 92 a suspek ti napapatay da.
Mainaig iti daytoy, kinumpirmaran ti Balochistan Liberation Army (BLA) rebel group nga isuda ti adda iti likudan dagiti panagatake, ken inpetteng da a dinosdosena a soldado ti napatay da.
Ti nasao a pasamak ket maibilang a maysa kadagiti “deadliest days” ti kinadamsak iti marigrigat a probinsya, no sadinno a ti gobierno ti Pakistan ket makilablaban iti ethnic insurgency iti uneg ti sumagmamano a dekada.
Inkusaran met ti Pakistan ti India a mangsupsuporta iti Balochistan Liberation Army, banag a namin-adon a daras a naglikudan ti Delhi ti akusasyon iti pagilian da.
Mainaig iti daytoy, inpalgak ti military a naruay dagiti panagatake a ti puntirya ket dagiti sibilyan iti aglawlaw ti ciudad ti Quetta ken dadduma a lugar iti Pakistan.
Kabayatanna, dinayaw ni Pakistani Prime Minister Shehbaz Sharif dagiti soldado, ken inkari na nga agtultuloy ti gubat kontra iti terorismo agingga a naan-anay a maparmek dagitoy.
Ti probinsya ti Balochistan ket pagnanaedan ti 5 a porsiento manipod iti nasurok a 240 a populasyon iti Pakistan, ken daytoy ti maibilang a kabaknangan no maipanggep iti natural resources, pakairamanan ti gas ken minerals.
