LAOAG CITY – Umabot iti 186-milyon a pisos ti balor na a marijuana ti ginabot ken pinuuran dagiti otoridad iti nagbedngan ti Ilocos Sur ken Benguet.
Partikular a naiyuswat ti operasyon iti kabanbantayan a paset ti Barangay Licungan, Sugpon, Ilocos Sur ken Barangay Tacadang, Kibungan, Benguet, pakairamanan ti Mount Boa ken Mount Leteban.
Ti operasyon ket nagbibinnuligan nga insayangkat ti Drug Enforcement Agency – Regional Office I (PDEA RO I) – -Regional Special Enforcement Team (RSET), PDEA La Union Provincial Office (LUPO), PDEA Pangasinan Provincial Office (PANGPO), PDEA Ilocos Sur Provincial Office (ISPO), PDEA Ilocos Norte Provincial Office (INPO), Police Regional Office I-Regional Mobile Force Battalion (PRO I-RMFB), Ilocos Sur Police Provincial Office-Provincial Drug Enforcement Unit (ISPPO-PDEU), ISPPO-Provincial Investigation and Detection Management Unit (ISPPO-PIDMU), ISPPO-1st and 2nd Provincial Mobile Force Company (ISPPO 1st/2nd PMFC), PNP Drug Enforcement Group (PDEG), ken ti Sugpon Police Station.
Segun ken ni Philippine Drug Enforcement Agency (PDEA) Region I Regional Director, Atty. Benjamin G Gaspi, ti operasyon da ket nagpaot ti innem nga aldaw no sadinno a nakagabot da ti 628,295 a poon ti marijuana nga agbalor ti P125,647,000.00; 211,795 a pedaso ti marijuana seedlings nga agbalor ti P44,471,800.00; ken 135 kilograms ti marijuana fruiting tops nga agbalor me ti 16,320,000.
Inpetteng ni Gaspi a ti agtultuloy nga operasyon da ket paset ti napaigetan a kampanya ti gobierno tapno malapdan ti panagmula ken panagado ti illegal drugs aglalo kadagiti geographically isolated ken boundary areas a gundawayan dagiti drug syndicates.
