LAOAG CITY – Umabot iti 19 a tattao ti natay iti panangipatungpal ti Israel kadagiti air strikes iti southern Lebanon.
Basar iti report, 10 manipod iti nasao a bilang a pakairamanan ti 3 nga ubbing ken 3 a babbai ket pimmusay iti naminsan laeng a panagatake ti Israel no sadinno a natamaan ti maysa a balay iti ili ti Deir Qanoun.
Nairaman ti Lebanon iti gubat a nangrugi idi Marso 2 ita a tawen kalpasan a pinabantoan ti Iran-backed armed Shia Islamist group Hezbollah ti rockets ti Israel kas panagibales da para iti US-Israeli strikes a nakatayan ti supreme leader ti Iran.
Ti kaudian a pannakairekord ti kaadda dagiti pimmusay ket napasamak agarop maysa laeng a lawas kalpasan nga nagtulag ti Estados Unidos ken Lebanon para iti pannakaiyalud-od ceasefire iti sabali pay nga 45 nga aldaw, ken maituloy ti saritaan ti dua a partido apaman a matappugan ti bolan ti Hunyo ita a tawen.
