LAOAG CITY – Kakurapayan ni Senador Chiz Escudero idinto a kabaknangan met ni Senador Mark Villar kadagiti 19 a Senador a nangipublikar ti Statement of Assets, Liabilities and Net Worth wenno SALN-da.
Basar iti certified true copy ti Statement of Assets, Liabilities and Net Worth nga inruar iti opisina ni Senate Secretary Renato Bantug Jr., dumanon iti ₱1.261 billion ti pakabuklan a baknang ni Villar idinto a ₱18.8 million met ken ni Escudero.
Simmaruno ken ni Mark Villar, ni Senador Raffy Tulfo nga addaan ti pakabuklan a baknang a ₱1.052 billion.
Sinaruno da:
Sen. Erwin Tulfo – ₱497 million.
Sen. Migz Zubiri – ₱431.78 million.
Sen. Camille Villar – ₱362.07 million.
Sen. Ping Lacson – ₱244.94 million.
Sen. Robin Padilla – ₱244.04 million.
Sen. Jinggoy Estrada – ₱221.21 million.
Sen. Lito Lapid – ₱202.04 million.
Sen. Tito Sotto – ₱188.87 million.
Sen. JV Ejercito – ₱137.08 million.
Sen. Pia Cayetano – ₱128.29 million.
Sen. Win Gatchalian – ₱89.52 million.
Sen. Bam Aquino – ₱86.55 million.
Sen. Loren Legarda – ₱79.21 million.
Sen. Joel Villanueva – ₱49.50 million.
Sen. Kiko Pangilinan – ₱26.73 million.
Sen. Risa Hontiveros – ₱18.99 million.
Sen. Chiz Escudero – ₱18.84 million.
Kabayatanna, kadagiti 19 a Senador a nangiruar ti Statement of Assets, Liabilities and Net Worth, walo kadakuada ti nairekord nga awan ti utangna wenno liability pakairamanan ditoy da Senators Raffy Tulfo, Escudero, Gatchalian, Aquino, Padilla, Pangilinan ken ti agkabsat a Villar.
Lima pay a Senador ti saan pay a nangiruar ti kinabaknangda a pakairamanan da Sen. Alan Cayetano, Sen. Bato dela Rosa, Sen. Bong Go, Sen. Rodante Marcoleta ken Sen. Imee Marcos.
Inbatad ni Gatchalian, Chairman ti Committee on Finance, naaddaan laeng ti bassit a panaggaraw ti assets-na.
Inpettengna a napateg nga ipublikar dagiti opisial ti gobierno ti kinabaknangda tapno maisubli ti talek ti publiko kadagiti opisial ti gobierno.
Inlawlawagna a ti panangipublikar ti Statement of Assets, Liabilities and Net Worth ket maysa a kongkreto nga addang tapno maipakita ti transparency ken integridad dagiti opisial ti gobierno.
Innayon ni Gatchalian, gapu ta saggaysan dagiti mangiparparuk-at ti Statement of Assets, Liabilities and Net Worth dagiti Senador, sumaruno metten dagiti dadduma pay nga agpanpanday linteg.
