LAOAG CITY – Kinumpirmaran ni officer in charge Mrs. Marilou Pasalo iti Bingao National High School iti ili ti San Nicolas nga adda ti 19 nga estudyante a dimmalan ti initiation.
Segun kenni Pasalo, napasamak daytoy kadagit menor de edad iti ruwar ti pagadalan ken saan nga oras iti klase.
Inbatad na nga iti idadalan dagiti estudyante iti initiation ket nasinit ti bukot da ken saan a maymaysa nga aldaw a napasamak.
Kuna ni Pasalo a kinasarita da ti grupo a maipagarop a pagserkan dagiti estudyante a no mabalin ket saan da nga i-recuit dagiti ubbing gapo ta kaasi da ken maapektaran ti panagbasa da.
Naamoan a kalpasan nga inreport da iti PNP ti pasamak ket nangiyuswat da symposium tapno mabalakadan dagiti ubbing a saan a sumrek ti anyaman a grupo wenno fraternity.
Kabayatanna, kuna ni Police Chief Inspector Paul Benedict Parado, chief of police ti PNP-San Nicolas nga iti duktal da ket inswitik dagiti ubbing iti grupo ti tawen da ken inbaga dagitoy a pinalubusan isuda dagiti nagannak da.
Mainaig iti daytoy, naamoan nga ita nga aldaw ket maiyuswat ti panagsasarita ti PNP-San Nicolas ken ti head ti grupo.
