LAOAG CITY – Natay ti 19 nga indibidual gapu iti Hurricane Melissa idiay Jamaica.
Daytoy ti inpakaammo ni Information Minister Dana Morris Dixon.
Segun kenkuana, agtultuloy ti pannakaiwayat ti search and rescue operations ken maikarkarigatan a maipaay ti tulong kadagiti ad-adda a naapektaran a lugar gapu iti dimmuprak a bagyo.
Inbatadna a nagtalinaed nga awan ti suplay ti kuryente iti kaaduan a paset ti isla, nadadael dagiti pagtaengan gapu iti layos ken rinibu a tattao ti agkidkiddaw ti naan-anay a tulong.
Kunana a nangrugi metten a simmangpet dagiti tulong iti eropuerto ti kabisera ti Jamaica a Kingston.
Mainaig iti daytoy, inpakaammo ni United Nations coordinator ti Haiti a ni Gregoire Goodstein nga adda ti agarup 15 a ribu nga indibidual ti nagtalinaed iti sumurok 120 a shelters idiay Haiti.
Basar iti World Food Programme, manarimaan ti koordinasion para iti cash ken emergency supplies idiay Jamaica, Cuba, Haiti ken ti Dominican Republic.
Kabayatanna, kuna ti United States Department a mangi-deploy-da ti disaster response team iti rehion tapno tumulong iti search ken rescue operations ken mangipaay ti taraon, danum, medical supplies, hygiene kits ken temporary shelters.
