LAOAG CITY – Kalikagum ti 1st District Congressional Office nga adda ti regular nga opisina ti Land Transportation Office iti ili ti Burgos.
Daytoy ti rason no apay nga adda ti idonar ti lokal a gobierno iti ili ti Burgos a 1,000 square meters a lote tapno adda pakaipasdekan ti building.
Inbatad ni Mayor Cresente Garcia nga apaman nga ipasa ti Sangguniang Bayan ti resolusion ti deed of donation ket insigida nga ipakaammoda daytoy iti Congressional Office tapno mapundoan ti building.
Inlawlawagna a no mapalawa ti nasao nga opisina ket manayonan pay ti maaddaan nga empleado ken serbisio nangruna ket awan pay ti registration no diket renewal pay laeng gapu ta kurang dagiti ramitda.
Kunana a maobserbaranna a masansan pay nga adda dagiti agsubli-subli ditoy siudad ti Laoag manipud iti ili ti Burgos ken pakairamanan dagiti kabangibang nga ili no sadinno a marigatan dagitoy.
Innayonna a nasken a maipalawa daytoy tapno maalay-ayan ti panagdudupudop dagiti tattao kadagiti dua a Land Transportation Office ditoy siudad ti Laoag ken iti siudad ti Batac.
