LAOAG CITY – Nagyaman ni 1st Olympic Gold Medalist Hidilyn Diaz gapu ta in-inot a nairaman ti weightlifting iti Palarong Pambansa.
Kuna na nga ibilang na ti pannakairaman ti weightlifting iti Palarong Pambansa kas “mission accomplished”.
Inrakurak na a kas technical director ket naragsak gapu ta makitkita na dagiti ubbing nga in-inot a manggun-gun-od ti arapaap na.
Inaadmitir na nga iti umuna ken maikadwa nga aldaw a panagsansanay dagiti atleta ket marigatan da ngem iti agdama ket naka-adjust dagitoyen ken kabisado dan dagiti technique.
Inpakaammo ni Diaz nga adda ti 9 a rehiyon a makipaset iti demosport ken adda ti pakabuklan a 70 nga atleta dagiti makipaset iti daytoy.
Inlawlawag na a ti kangrunaan a misyon da ket ti tumulong iti komunidad ti weightlifting ken inpasigurado na ti patas a trato da kadagiti amin nga atleta ken addaan ti integridad ti ar-aramiden da.
Mainaig iti daytoy, inpakaammo ni Diaz a dagiti us-usaren da nga equipments ket binulod da laeng iti Samahang Weightlifting ng Pilipinas ken Philippine Sports Commission.
Gapu iti daytoy, ginutigot na ti suporta dagiti lokal a gobierno a gumatang ti equipments para kadagiti atleta gapu ta no awan ti usaren da ket awan metlaeng ti serbina.
