LAOAG CITY – Inpasingked ni PMaj. Arnel Tabaog, Deputy Force Commander ti 1st Provincial Mobile Force Company a kangrunaan nga akem ti grupo da iti ili ti Vintar ket ti panagresponde nu bilang adda dagiti pagteng ken pasamak.
Daytoy ket kalpasan nga isuda ti nadutukan a temporaryo a mangiwanwan ti linak ken talna iti nasao nga ili kabayatan nga adda iti lockdown ti stasyon ti PNP Vintar gapu iti nagpositibo a pulis.
Inbaga ni Tabaog a basar iti pammilin ni Provincial Director Pol. Col. Christopher Abrahano, isuda pay laeng ti agserbi iti nasao nga ili agingga a malpas ti panagquarantine dagiti amin a kameng ti PNP Vintar ken pannakaikkat ti lockdown.
Kuna na temporyo nga agpaay da iti barangay hall ti Barangay 2 iti nasao nga ili ken isuda ti agited kadagiti pagkasapulan dagiti naka-quarantine a pulis.
Mainaig iti daytoy, inlawlawag na a dagiti kalikagum na ti mangala iti travel pass ket temporaryo a maikoordinar iti provincial office bayat a nakalockdown ti PNP Vintar.
Innayun na iti agdama ket walo da pay laeng a kameng ti 1st Provincial Mobile Force Company ti nakai-deploy iti ili ti Vintar ken manamnama a manayunan iti sumaruno nga aldaw.
