LAOAG CITY – Inyistorya ni Mr. Joel Corpuz, agpaparenta ti van ditoy ciudad ti Laoag ti nagbalin a kapadasan da iti dua a chinese national ken maysa a pinay nga adda kadwa da a dua nga ubbing a nagpatulnog idiay San Simon, Pampanga.
Inlawlawag na a nagpatulnog dagiti maseknan idiay San Simon, Pampanga ken ti napagtutulagan da a bayadan da ket 16 ribo a pisos.
Inbatad na nga awan ti naideposito dagiti maseknan gapu ta inbagada a saan da pay a nakapasupli.
Nupay kasta, apaman a nakadanun da idiay Pampanga ket bimmaba dagitoy ken nagpukaw lattan dagiti dua a gangannaet idinto a ti nagammatan da ket ti babai.
Naamoan a maysa kadagiti gangannaet ket asawa ti nasao a pinay.
Inreport met dagiti driver ni Corpuz iti PNP idiay Pampanga ti napasamak ken adda ti pulis nga ilukano a nakadestino iti lugar a timmulong kadakuada.
Innayon na nga inbaga kadakuada ti pulis a ti kayat da a matiliw ket dagiti dua a gangannaet nga awan ti dokumento na ken nakisarita da a pakawanen da lattan ti babai gapu ta kaasi daytoy ken awan ti agaywan kadagiti annak na.
Immanugot ni Corpuz ket iti agdama ket agtultuloy ti imbestigasyon dagiti otoridad kontra kadagiti dua a naglibas gangannaet.
