LAOAG CITY – Manamnama a mapilaan ti reklamo dagiti dua a gasoline boy gapu iti Malicious Mischief.
Segun ken ni Police Captain Roi Manuel Ordonio, ti Hepe iti Philippine National Police iti ili ti Vintar, nabigbig dagiti suspek nga isuda Marvin Paul Sampayan y Raras, agtawen ti 27, awanan asawa ken residente ti Brgy. 34, Gabu ditoy siudad ti Laoag ken ni Maymar Salvador y Legaspi, agtawen ti 28, awanan asawa ken residente ti Brgy. 13 Magat-Salamat ditoy siudad ti Laoag.
Inbatadna a nabigbig met ti biktima a ni Rizalino Gamido Jr., agtawen ti 44, awanan asawa, mekaniko ken residente ti Brgy. 1 San Roque iti ili ti Vintar.
Inlawlawagna a basar iti insayangkatda nga imbestigasion, bayat nga agpatpatrolya dagiti police personnel iti ili ti Vintar iti paset ti Brgy. 4, Sta. Maria iti nasao nga ili ket adda ti komosion a nagbaetan dagiti tallo nga indibidual.
Inpalgakna a napan naganawa dagiti otoridad ngem nagbalin nga arogante dagiti dua a suspek rason nga inarestarda dagitoy.
Kunana a dagiti suspek ket nakalugan ti motorsiklo idi a kellaat nga immagawda ti linya ti kalsada nga isu ti ayan ti biktima a nakalugan ti SUV rason a binusinaanna isuda.
Mainaig iti daytoy, inbatad ni Police Captain Ordonio a nag-U-turn dagiti nakamotorsiklo ken sinubliananda ti SUV ket ditoy a tinuktokda ti tawa ti lugan ti biktima ngem saanna daytoy a linukatan.
Gapu iti daytoy, kunana a binuong ti maysa kadagiti suspek a ni Maymar ti tawa ti SUV babaen ti bote ti arak a nangitunda ti pannakadadaelna.
Innayonna a mapilaan pay dagiti dua a suspek ti kaso gapu iti panagsalungasingda iti Section 5 ti Republic Act No. 10586.
