LAOAG CITY – Natay ti dua a lallaki kalpasan a napaltu-paltogan iti paset ti national highway iti Barangay Paltit iti ili ti Badoc.
Nabigbig dagiti biktima nga isuda Erwin Rondal a residente ti Barangay Napu iti ili ti Badoc ken James Fernandez a residente ti Barangay Bulbulala iti ili ti Pinili.
Segun ken ni P/MSgt. Jackiechan Cajigal, ti Badoc Municipal Police Station, basar iti inisyal nga imbestigasionda, kabayatan a dumaldalyasat dagiti biktima a nakalugan ti SUV nga agturong nga agpa-amianan ket kellaat lattan a pinaltu-paltogan dagiti saan pay a nabigbig a suspek a sumarsaruno kadakuada a nakalugan ti maysa nga Innova nga agmaris ti puraw ken maysa a pick-up nga agmaris ti nangisit.
Inbatadna a rumrummuar a naggapu iti galyeraan dagiti biktima idi napasamak ti insidente.
Inlawlawagna nga adda ti sumurok 30 a basyo ti bala ti narekobre dagiti otoridad iti nakapasamakan ti krimen ngem saan pay a masinunuo no ania a klase ti paltog ti inusar dagiti suspek.
Kunana nga immuna a naitaray iti maysa a pribado nga ospital ti biktima babaen kadagiti kameng ti Rural Health Unit ken Bureau of Fire Protection.
Nupay kasta, naiyakar dagiti biktima iti ospital idiay Sinait, Ilocos Sur ngem gapu ta kurang ti personnel ket naiturong dagitoy iti Mariano Marcos Memorial Hospital and Medical Center iti siudad ti Batac a naideklarar a dead on arrival.
Innayon ni P/MSgt. Cajigal nga adda ti nakaimuntar a Close Circuit Television wenno CCTV camera iti lugar a dakkel a makatulong iti imbestigasionda nangruna iti pakabigbigan dagiti suspek.
Naammoan a nagsagaba ti tama ti paltog iti nagduduma a paset ti bagi dagiti biktima a puon metten ti nakatayanda.
Iti agdama, agtultuloy ti iwaywayat nga imbestigasion dagiti otoridad mainaig iti pammaltog.
