LAOAG CITY – Nagdinnungpar ti dua a motorsiklo iti paset ti Josefa Llanes Escoda National Highway iti Brgy. Mariquet iti ili ti Solsona.
Basar iti Solsona Municipal Police Station, nabigbig ti driver ti motorsiklo a Sym nga agmaris ti nalabbaga a ni Erick Agustin y Alejo, agtawen iti 50, naasawaan ken residente ti Brgy. Juan iti nasao nga ili idinto a nabigbig met ti nangiturong ti maysa pay a motorsiklo nga Honda TMX 155 nga agmaris ti nangisit a ni Arjay Lorenzo y Ramos, agtawen iti 35, balo, mannalon ken residente ti Brgy. Lupitac iti ili ti Piddig.
Maibasar iti naiwayat nga imbestigasion, dimmalyasat ti Sym motorcycle nga agturong nga agpa-laud idinto a ti Honda TMX 155 ket agpa-daya.
Rumrummuar a ginandat a nag-overtake ti nangiturong ti Honda TMX 155 ti sarsarunoenna a kurong-kurong ngem saanna a naripar ti Sym motorcycle a sumungsungad iti sabali a kalsada.
Gapu iti daytoy, nagsagaba ti sugat iti akin-kannigid a saka ti driver ti Sym motorcycle idinto a nagsagaba met ti sugat iti nagduduma a paset ti bagi ti nangiturong ti Honda TMX 155 no sadinno a naitaray dagitoy iti Piddig Hospital para iti naan-anay a pannakatamingda.
Kabayatanna, naammoan a dagiti dua a nakamotorsiklo ket agpada nga awan ti driver’s license-da ken awan ti plate number dagiti luganda.
Iti agdama, agtultuloy pay laeng ti iwaywayat nga imbestigasion dagiti otoridad maipapan iti napasamak a desgrasia.
