LAOAG CITY – Nagdinnungpar ti dua a nakamotorsiklo iti Vintar-Laoag Road iti Barangay 1, San Roque iti ili ti Vintar.
Ti driver ti motorsiklo a Yamaha Mio 125 ket agtawen ti 20, awanan asawa, construction worker ken residente ti Barangay 9 Lubnac iti ili ti Vintar idinto a ti biktima a nangiturong ti motorsiklo nga Honda Wave 125 ket agtawen ti 82, naasawaan, senior citizen ken residente ti Barangay 17 P.F. Alviar iti ili ti Vintar.
Basar iti Vintar Municipal Police Station, kabayatan a dumaldalyasat ti Yamaha Mio 125 nga agturong nga agpa-daya ket kellaat a napan iti main road ti Honda Wave 125 a nangitunda ti panagdinnungparda.
Gapu iti daytoy, nagsagaba ti nakana a sugat iti ulo ti driver ti Honda Wave 125 a naitaray iti Governor Roque B. Ablan Senior Memorial Hospital ditoy siudad ti Laoag para iti pannakatamingna ngem naideklarar a dead on arrival babaen ti attending physician a ni Dr. Jeben Dhana Aquino idinto a nagsagaba ti minor injuries ti kinalubbon ti nangiturong ti Yamaha Mio 125.
Naammoan a maipagarup a napaspas ti taray ti driver ti motorsiklo a Yamaha Mio 125 idi napasamak ti disgrasia.
