LAOAG CITY – Agtultuloy ti imbestigasion dagiti kameng ti Bureau of Fire Protection iti ili ti Pagudpud kalpasan a nauram ti dua a pagtaengan iti Brgy. Balaoi iti nasao nga ili.
Basar iti Bureau of Fire Protection, nakaawatda ti report nga adda ti maur-uram rason a dagusda a napan nagresponde.
Adda ti tallo a pamilia ti maseknan a nauraman ngem awan ti naipadamag nga adda ti nadangran iti nasao nga insidente.
Naammoan nga adda ti dua a fire truck ti napan nagresponde gapu iti kinaalisto ken kinadakkel ti apoy iti uram.
Mainaig iti daytoy, saan pay a masinunuo dagiti otoridad no mano ti pakabuklan ti balor ti naperdi a kagamitan dagiti maseknan a pamilia.
Kabayatanna, iti agdama ket manarimaan pay laeng nga am-ammoen dagiti otoridad ti rason ti namunganayan ti napasamak nga uram.
