LAOAG CITY – Balligi ti naiyuswat a search operation babaen kadagiti kameng ti Philippine National Police iti panangidaulo ni Police Major Carlo Abing ti chief of police iti ili ti Pagudpud.
Ti naiserbi a search warrant ket inparuk-at ni HON. CHARLES JAVIER M CALAPINI, Presiding Judge ti Regional Trial Court First Judicial Region, Branch 19, iti ili ti Bangui gapu iti panaglabsing iti Republic Act 10591 wenno “Comprehensive Firearms and Ammunition. Regulation Act”.
Binigbig ni Abing ti subject ti operasyon a ni Mr. Moody Manegdeg, agtawen ti 49, awanan ti asawa, mangngalap ken residente iti Sitio Sinamar, Brgy. Poblacion 2, iti ili ti Pagudpud.
Innayon a kas resulta iti naiyuswat nga operasyon ket nakumpiskar dagiti otoridad ti maysa a caliber 9mm, maysa a caliber 22, lima a bala para iti Cal 22, maysa a magazine ti 9mm nga addaan ti uppat a bala, 95 a bala para iti cal 9mm, maysa nga sling bag nga agmaris ti nangisit ken maysa nga sling bag nga agmaris ti grey orange.
Naamoan nga adda ti naidanun a report iti Philippine National Police a no rumuar ti suspek ket maipagarop nga adda ti ik-ikutan na a paltog isut gapuna nga inwayatan da ti operasyon.
Iti agdama, nagtalinaed ti suspek iti Philippine National Police iti ili ti Pagudpud ken sumango iti maiyannatop a kaso.
