LAOAG CITY – Inpakaammo ni Mayor Albert Chua iti siudad ti Batac nga adda ti dua a pamilia manipud iti Brgy. Ricarte iti nasao a siudad ti naibakwit iti evacuation center gapu iti iduduprak ti Bagyo Julian ditoy probinsia.
Segun kenkuana, kabayatan ti panangliklikosna kaduana dagiti personnel ti City Disaster Risk Reduction and Management Council iti aglawlaw iti siudad ti Batac ket addan iti Alert Level ti Quiaoit River a naiget ita a mamonmonitor.
Inbatadna a naka-deploy dagiti heavy equipment ken naka-preposition dagiti food packs para kadagiti naapektaran a residente iti idadalapos ti bagyo.
Kunana a saan pay laeng a mapalubusan dagiti 4-wheel vehicles a dumalyasat iti paset ti Batac-Banna Road gapu iti pannakalayos ti kalsada.
Inlawlawagna nga awan met dagiti nakapasar ti nabayag a pannakapukaw ti serbisio ti kuriente iti siudad ti Batac gapu ta dagus met nga agresponde ti Ilocos Norte Electric Cooperative.
Innayonna nga agtultuloy met ti panangmonitorda iti weather forecast ti PAGASA tapno masintirda ti agbalin a situasion ken epekto nga itunda ti Bagyo Julian.
