LAOAG CITY – Inpakaammo ni Major Bryan Albano, ti Civil Military Operations Officer of the 501st Infantry Valiant Brigade ti Philippine Army nga adda ti dua a personalidad nga imonmonitorda a posible nga adda iti likudan ti napasamak a rinnupak ti Ilocos-Cordillera Regional Committee ken ti 50th Infantry Batallion.
Segun kenkuana, nangrugi ti panagsisinnukat ti putok dagiti dua a grupo iti agarup 11:50 ti pangaldaw agingga a nagtultuloy ti rinnupak iti agsipnget idiay Brgy. Nagcanasan, Pilar, Abra.
Inbatadna a manarimaan pay laeng nga agpapaimbag ni Corporal Markson Tadeo ti 50th Infantry Batallion a tubo iti Pilar, Abra a nagsagaba ti sugat iti takiagna idinto nga awan pay ti nasugatan kadagiti kameng iti makakannigid a grupo.
Inlawlawagna nga adda ti 21 nga households ken 84 nga indibidual ti naibakwit iti Evacuation Center tapno maliklikan a maipit iti riribok dagiti dua a grupo.
Kunana a saanda pay laeng nga ipalubos nga agsublida iti pagtaengan agingga a saan pay a masigurado ti kinatalgedda kontra kadagiti armado a grupo.
Mainaig iti daytoy, kuna ni Major Albano nga adda metten ti tulong a naawatda dagiti maseknan a residente manipod iti Philippine Red Cross.
Inpasingkedna a lappedanda a makasubli pay dagiti kameng ti Ilocos-Cordillera Regional Committee tapno awan ti maapektaran ken madangran.
Innayonna nga immunadan a namonitor ti nasao a grupo iti amianan a paset ti Abra ken Kalinga a naggandat a sumrek iti probinsia ngem saanda a nagballigi.
Kabayatanna, kalikagum ti makakannigid a grupo a makastrek iti probinsia ti Ilocos Sur tapno sublianan dagiti dati a ramit a panggubat a nabatida iti lugar.
