LAOAG CITY – Im-imbestigaren ti embahada ti Pilipinas iti United Arab Emirates ti report a maipagaarop a dua a Pilipino ti naarestar idiay Dubai gapu iti maipagarop a panagrecord ken panagiwaras da kadagiti video mainaig kadagiti panagraot iti pagilian iti kallabes.
Iti maysa nga statement, inbatad ti Philippine Embassy iti Abu Dhabi ken Consulate General iti Dubai a nagkiddaw dan ti opisyal a kumpirmasyon ken impormasyon anipod kadagiti otoridad iti UAE maipanggep iti pakabigbigan, agdama a sitwasyon ken legal a sitwasyon ti dua a Pilipino.
Basar kadagiti opisyal, respetaren ti Pilipinas ti soberanya ti UAE ken ti panangipatungpal na ti linteg mainaig iti national security, cyberycrime ken public order kalpasan ti panagpalagip dagiti otoridad ti UAE a ti panagiwaras ti saan nga usto ken saan a beripikado nga impormasyon maipanggep iti seguridad, karaman dagiti video ti air defense interceptions, panagatake kadagiti landmark, uray ti AI-generated a video ken mabalin nga ibilang a krimen nga adda ti katukad na a pannakabalud ken nadagsen a multa.
Gapu iti daytoy, nagpanawagan dagiti diplomatiko nga opisyal kadagiti Pilipino iti UAE nga agbalin a naannad kadagiti aktibidad da iti internet ken binalakadan da dagiti komunidad a liklikan ti agala kadagiti video, panagpost iti internet wenno panagkomento kadagiti saan a kumpirmado nga isyu iti seguridad.
