LAOAG CITY – Inaprobaran ti Sangguniang Panlungsod ditoy siudad ti Laoag ti dua a porsiento a diskuento ti buis para kadagiti accommodations ken establishments.
Segun ken ni Sangguniang Panlungsod Member Handy Lao, babaen iti daytoy ket ad-adda a magutigot dagiti business owners a makikoordinar iti panangited ti datos ti bilang dagiti agturturong a turista ditoy siudad.
Inbatadna a daytoy ti maysa kadagiti wagas a napanunutanda tapno maammoan pay dagiti kasapulan dagiti maseknan a mangpapintas iti benneg ti turismo ditoy siudad ti Laoag.
Inlawlawagna a no kaspangarigan ket adda ti 100 a ribu a turista ti bimmisita ditoy siudad ita a tawen ket adalenda no kasano a madoble ti bilang dagitoy nga agpasiar inton sumaruno a tawen.
Kunana a daytoy a tignay ti konseho ket maipatungpal iti las-ud laeng ti tallo a tawen.
Kabayatanna, mangnamnama ni Konsehal Lao nga aprobaran daytoy nga ordinansa iti Sangguniang Panlalawigan para iti naan-anay a pannakaipatungpalna.
