LAOAG CITY – Nasapgud dagiti dua a senior citizen iti maysa nga SUV iti Brgy. Apatut-Lubong iti ili ti Pinili.
Segun ken ni Police Captain Kester Arellano, ti Hepe iti Philippine National Police iti nasao nga ili, nabigbig dagiti dua a baket nga isuda Julita Jara y Magallanes, agtawen ti 75, naasawaan ken residente ti Brgy. Gabut Sur iti ili ti Badoc ken ni Clemencia Sadac y Baligad, agtawen ti 75, balo, tubo iti Brgy. Apatut-Lubong iti ili ti Pinili ken residente idiay Duquit, Mabalacat, Pampanga.
Inbatadna a nabigbig met ti nangiturong ti Toyota Innova nga agmaris ti nangisit ken addaan ti plate number a PHQ 402 a ni Susane Soller y Cobangbang, agtawen ti 68, awanan asawa ken residente idiay Brgy. Rizal, Cabugao, Ilocos Sur.
Inlawlawagna a basar iti insayangkatda nga imbestigasion, bayat a magmagna dagiti biktima a senior citizens iti pedestrian lane nga agpa-daya ket ditoy a kellaat a nasapgud ti SUV nga inturong met ti maysa met a senior citizen.
Gapu iti daytoy, kunana a natulid dagiti dua a biktima iti kalsada no sadino natukkol ti akinkannawan a collar bone ni Lola Julita ken nagsagaba ni Lola Clemencia ti sprain ti akinkannawan a takiagna a natairay dagitoy iti Karmelli Clinic and Hospital ngem naiyakar iti Mariano Marcos Memorial Hospital and Medical Center iti siudad ti Batac.
Innayonna nga iti agdama ket nakaruaen iti ospital ti maysa kadagiti biktima ti desgrasia.
Kabayatanna, naammoan a nagsasarita metten dagiti agsumbangir a partido maipapan iti daytoy a banag rason a nasolbar met laeng daytoy nga insidente.
