LAOAG CITY – Naglabsing ti dua a tricycle driver ti Laoag International Airport gapu iti overcharging wenno sobra iti panagsingir ti plete kadagiti pasaheroda.
Segun ken ni P/Col. Renante Baltazar, Chief ti Aviation Security Unit ti nasao nga eropuerto, daytoy ket kalpasan ti naimballigian a panangiwayatda ti entrapment operation.
Inbatadna a dagiti agpaspasada a tricycle drivers ti tinutukanda ita a lawas tapno maipasigurado nga awan ti driver nga agsingsingir ti nangina a plete kadagiti pasahero nangruna kadagiti turista wenno gangannaet.
Inlawlawagna a nagbalin nga epektibo dagiti estratehia nga ar-aramidenda tapno maduktalan dagiti saan a sumursurot iti linteg trapiko.
Kunana a kabinnuligda ti Land Transportation Office manipud iti regional office para iti naig-iget a panangipatungal ti operasionda.
Maipalagip nga adda ti maysa a taxi driver ti Laoag International Airport ti nakumpiskar ti driver’s license-na gapu met laeng iti overcharging.
