LAOAG CITY – Maibilang dagiti dua a biktima ti pammaltog iti paset ti Barangay 50-Buttong ditoy ciudad ti Laoag kas gun for hire.
Daytoy ti naduktalan dagiti otoridad iti agtultuloy nga imbetigasyon da iti napasamak nga insidente.
Nabigbig dagiti biktima a da Jonathan Bagamaspad, taga Barangay Bungcag iti ili a Dingras ken ni Rollo Corpuz a residente met iti Barangay 5, San Vicente iti ili ti Sarrat.
Agpada a naitaray iti Laoag City General Hospital (LCGH) ditoy ciudad ti Laoag dagiti biktima ngem naiyakar ni Corpuz iti Mariano Marcos Memorial Hospital and Medical Center idiay ciudad ti Batac.
Rumrumuar a nakana dagiti sinagaba a sugat ni Corpuziti bakrang ken tengnged na idinto a ni Bagamaspad ket nagtalinaed iti LCGH.
Agpapan ita ket saan pay a madeterminar no ania ti tama ni Bagamaspad ken no siasinno kadakuada ni Corpuz ti target dagiti suspek.
Maipalagip a ni Bagamaspad ket maysa kadagiti maitudtudo a suspek iti pannakatay ni dati nga INEC Director Lorenzo Ruiz ken maysa daytoy kadagiti respondent iti napasamak nga ambush iti ili a Dingras no sadinno a maysa a kapitan ti natay, addan sumagmamano a tawenen ti napalabas.
Kabayatanna, rumrumuar a ni Corpuz ket nabayagen a bodyguard ni Bagamaspad.
