LAOAG CITY – Umabot iti dua a milyon a pisos ti balor dagiti nadadael iti Sta. Monica Church iti ili ti Sarrat gapu iti idadayyeg ti magnitude 5.8 a gingined ditoy probinsya.
Segun ken Mr. Marvin Ganal ti mangidadaulo ti Municipal Disaster Risk Reduction and Management Office iti nasao nga ili, insigida da a nangisayangkat ti assessment apaman nga adda nakita da a debris iti nasao a simbaan.
Kunana a maipalubos latta nga adda sumrek ken mausar ti simbaan ngem rumbeng nga naiget a maipatungpal ti precaution.
Ngem nu pay kasta, insuhesyon na a no mabalbalin ket maangay pay laeng ti misa iti church garden a mabirokan met laeng iti abay ti Sta. Monica Church.
Kabayatanna, inpakammu met dagiti staff iti nasao a simbaan nga inton Enero 2025, manamnama a ma-renovate ti simbaan nangruna iti altar nga isu ti addaan iti kakaruan a nadadael.
Naamuan a ti pondo a mausar ket manipud iti National Historical Commission of the Philippines (NHCP).
Iti agdama ket nadalusanen ken naipaknin dagiti nagregreg a debris.
