LAOAG CITY – Natay ti dua nga indibidual idiay Sweden kalpasan ti maysa a napigsa a bagyo kabayatan ti nalamiis a paniempo iti sibubukel a Nordic countries a nangitunda ti pannakaitantan iti panagbiahe ken pannakapukaw ti suplay ti kuriente.
Nangiparuk-at ti pakdaar ti Swedish Meteorological and Hydrological Institute mainaig iti napigsa nga angin iti dakkel a paset ti amianan ti nasao a pagilian kabayatan iti iduduprak ti Bagyo Johannes.
Natay ti maysa a lalaki nga agtawen ti 50 kalpasan a napandagan ti kayo iti Kungsberget ski resort iti abagatan ti pagilian idinto a basar iti regional utility company nga Heab a maysa kadagiti empleado daytoy ket pimmusay iti aksidente kabayatan nga adda iti ruar.
Napukawan ti suplay ti kuriente ti rinibribu a pagtaengan idiay Sweden, Norway ken Finland.
Mainaig iti daytoy, adda ti sumurok 40 a ribu a pagtaengan ti naapektaran ti pannakapukaw ti kuriente ken adu a serbisio ti tren ti nakanselar.
Naammoan nga adda dagiti sumagmamano a flights, rail ken ferry services kadagiti nagduduma a paset iti Nordic nations ti nakanselar.
