LAOAG CITY – Natay ti dua nga indibidual idinto a sumurok 60 ti nasugatan kalpasan a dinungpar ti kotse dagiti naruay a tattao kabayatan ti panaggatangda iti Christmas market idiay central Germany.
Segun ken ni Bombo International News Correspondent Kristan Jay Villanueva manipud idiay Germany, adda ti 68 a nasugatan gapu iti napasamak nga insidente no sadinno a 15 ditoy ket nagsagaba ti nakana a sugat.
Inbatadna a ti suspek ket agtawen ti 50 a lalaki a doktor manipud Saudi Arabia ngem addan ti agarup dua a dekada nga agnanaed idiay Germany.
Inlawlawagna a saan pay a nalawag wenno masinunuo dagiti otoridad ti pudno a gagem ti suspek iti nasao nga insidente.
Innayonna nga iti agdama ket adda iti pagbalodan ti suspek para iti pannakaipila ti reklamo kontra kenkuana.
