LAOAG CITY – Pagat-atapan ti gobierno ti dua nga agpanpanday linteg manipod iti Northern Luzon a maipagarop nga utek iti P4.5-B illegal cigarette operation.
Daytoy ti inbutaktak ni Department of the Interior and Local Government Secretary Juanito Victor “Jonvic” Remulla.
Inaramid daytoy ni Remulla kalpasan ti insayangkat nga operasyon dagiti operatiba iti maysa nga ilegal a pabrika ti sigarilyo iti Barangay Panipuan, no sadinno nga innem a Chinese national ti naarestar ken 60 a Pilipino ti naisalakan.
Segun ken ni Remulla, ti manufacturing plant ket nagoperate nga awan ti maiyannatop a lisensya ken permit idi Enero 2026 ken maipagarop a nakaaramid ti sumuruk-kumurang aP4.5 billion a balor ti sigarilyo.
Inpetteng ti sekretaryo nga adda ti impormasyon ti Department of the Interior and Local Government (DILG) a nangrugi ti operasyon idi Enero 1, idinto a naipatakder paylaeng dagiti makina idi Disyembre 2025 sakbay a dimteng dagiti Chinese national.
Basar iti DILG chief, dagiti mangmangged a Pilipino ket biktima ti human trafficking no sadinno a pinilit da dagitoy nga agtrabaho nga awan ti sweldo da ken saan a makatao a kondisyon.
Inpaganetget ni Remulla a ti human trafficking ken dagiti panaglabsing iti Anti-Agricultural Sabotage Act ken agpapada a non-bailable offense.
Binigbig ti Department of the Interior and Local Government dagiti incorporator ti warehouse kas tallo a Pilipino ken dua a Korean national.
Inpakaammo met ni PNP Criminal Investigation and Detection Group (CIDG) Director Robert Morico II, naipatuluden ti subpoena iti maysa kadagiti Pilipino nga incorporator.
Iti nagsina a rakurak, inbatad ti Philippine National Police (PNP) nga adda ti pagpapadaan dagiti peke a sigarilyo a nakumpiskar idiay Pampanga kadagiti produkto a nabirukan kadagiti immunan nga operasyon iti Balete, Batangas idi Disyembre 31, 2025 ken iti Malabon idi Enero 1, 2026.
Segun ken ni Remulla, mapatta-patta a nasurok a P30 billion ti mapukpukaw ti gobierno iti kada tawen gapu iti illegal a trade ti sigarilyo.
Agtultuloy ti imbestigasyon dagiti otoridad tapno maamoan ti kinalawa ti operasyon ken ti pagsungsungbatan dagiti karaman, karaman ti mapagat-atapan nga opisyal ti gobierno.
