LAOAG CITY – Balligi ti dua nga aldaw a pannakaisayangkat ti Balikatan Exercise ti Armed Forces of the Philippines ken United States Armed Forces iti Brgy. Lapaz ditoy siudad ti Laoag.
Daytoy ti naragsak nga inpakaammo ni Col. Xerxes Trinidad, ti Public Affairs Office iti Armed Forces of the Philippines.
Segun kenkuana, napateg daytoy a banag gapu ta maysa daytoy kadagiti wagas nga ar-aramiden ti Armed Forces of the Philippines tapno ad-adda a maprotektaran ti pagilian a Pilipinas.
Inbatadna a babaen iti panagsanay manipod kadagiti nagduduma a lugar ditoy pagilian kas iti Batanes ken Palawan ket makapagsagana dagiti umili no ingkaso adda dagiti dakes a panggep a mapasamak.
Inlawlawagna iti maikadua ken maudi nga aldaw ti Balikatan Exercise ditoy probinsia ket naiwayat ti maritime strike no sadino ditoy a naipakita ti usar ti kapabilidad ti air component, land component ken naval component.
Kunana a napili iti Brgy. Lapaz ditoy siudad ti Laoag gapu ta makitada a napintas a pakaiwayatan ti training environment ti Balikatan Exercise.
Immuna iti daytoy, naisayangkat ti counter-landing drill a mangipakita ti kabaelan dagiti dua a puersa a lappedan iti aniaman a pangta ti seguridad ditoy pagilian.
Kabayatanna, inlawlawag ni Lt. Col. Omar Al Assaf ti United States Armed Forces a saan a containment strategy ti naisayangkat a Balikatan Exercise ditoy Ilocos Norte a maisupadi iti ibagbaga ti China.
Kunana a trabahoda a protektaran ti pagilian ken adda man ti gubat wenno awan ket nasken a mangiwayatda iti kapada a panagsanay.
Innayonna a dakkel nga oportunidad kadakuada a makaduada ti Philippine Army, Philippine Air Force, Philippine Navy ken Armed Forces of the Philippines iti naisangsangayan ken maibilang a pakasaritaan nga aktibidad.
