LAOAG CITY – Natay dagiti dua nga estudiante a nakamotorsiklo kalpasan a naidungpar dagitoy iti kayo ti eucalyptus iti Brgy. Suyo iti ili ti Dingras.
Segun ken ni PMaj. Norman Pentang, ti Hepe iti Philippine National Police iti nasao nga ili, agpada dagitoy a lallaki ken residente iti ili ti Dingras.
Inbatadna a dead on arrival iti ospital ti maysa kadakuada idinto a ti kaduana ket natay kabayatan a matamtaming iti balay-pagagasan.
Inlawlawagna a basar iti insayangkatda nga imbestigasion ket agpadpada a nakainom dagiti dua a biktima.
Naammoan pay ti Philippine National Police a parparitan ti pamilia dagiti biktima nga agmaneho gapu iti kinabartekda nga isu ti makaigapu a naidungparda.
Kabayatanna, naammoan a dagiti dua a biktima ket awanan ti high visibility vest ken awananda pay ti helmet idi napasamak ti desgrasia.
