LAOAG CITY – Nangipila ti counter-affidavit dagiti dua nga Independent Contractors ti Kapuso Network nga isuda Jojo Nones ken Richard Cruz iti National Bureau of Investigation (NBI) kontra iti sexual-abuse complaint ti aktor a ni Sandro Muhlach.
Ti laeng Legal Counsel ti dua a ni Atty. Maggie Abraham-Garuque ti simmango iti panangipila ti counter-affidavit.
Inbatadna nga iproproseso pay laeng ti National Bureau of Investigation ti ebidensia isu a saan pay a maikonsiderar ita kas maysa a kaso. Inpettengna a paglikudan dagiti klientena dagiti alegasion a maiyak-akusar kadakuada.
Inpettengna a nadungritan ti nasao nga alegasion ti reputasion da Nones ken Cruz nga adda iti industria iti uneg ti nasurok tallo a dekada.
Kabayatanna, manarimaan a dumaldalan ti aktor a ni Sandro iti psychological assessment. Immunan nga inbatad ti amana nga aktor a ni Niño Muhlach a makapaspasar ti anakna ti trauma ken depression gapu iti nasao nga insidente ti panangrames.
Maipalagip nga immunan a nangipila ti criminal complaint ti ubing nga aktor kaduana ti amana kontra kada Nones ken Cruz iti National Bureau of Investigation.
Timmaod ti reklamo kalpasan a nagwaras ti online ti isyu ti panangrames dagiti dua nga Independent Contractors ti network iti aktor kalpasan ti star-studded a Kalpuso Gala 2024 iti Manila Marriot Hotel idi Hulio 20.
