LAOAG CITY – Naarestar dagiti dua nga indibidual idinto a nakalibas met dagiti dua pay a kakaduada gapu iti iligal a panagsusugal iti maysa a minatayan iti Brgy. 3 ditoy siudad ti Laoag.
Basar iti Philippine National Police ditoy siudad ti Laoag, nabigbig dagiti dua a natiliw nga agpada nga agtawen ti 31 ken agpada dagitoy a residente iti nasao met laeng a barangay.
Balligi a naarestar dagiti maseknan kalpasan a naaktuaran dagiti otoridad nga agay-ayamda ti Lucky 9.
Gapu iti daytoy, nakumpiskar dagiti napan nagresponde a pulis ti 720 a pisos a mapapati a pusta dagiti suspek, gambling paraphernalia kas dagiti baraha, lamisaan ken tugaw.
Naammoan a naipadalan iti inquest proceeding ita nga aldaw iti City Prosecutor’s Office ditoy siudad dagiti dua a naarestar gapu iti panaglabsingda iti Presidental Decree 1602 wenno ti Anti-Illegal Gambling Law.
Kabayatanna, iti agdama ket adda iti kustodiar dagiti suspek iti kuerpo ti pulisia ditoy siudad ti Laoag.
