LAOAG CITY – Natay ti maysa nga indibidual idinto a nasugatan met ti maysa pay nga indibidual gapu iti pannakakurienteda iti Brgy. 17 iti ili ti San Nicolas.
Segun ken ni Mr. Leonard Bernabe, maysa kadagiti biktima ken nakasalat iti insidente, kabayatan nga agiinumda iti maysa a pasken ket kellaat a naitayab ti tolda a paglinlinunganda gapu iti napigsa nga angin kagiddan ti napigsa a tudo, gurruod ken kimat.
Inbatadna nga iti katengngaan ti panagiinumda ti arak ket nakuriente isuna pakairamanan ti maysa kadagiti kakaduana a nabigbig a ni Mr. Curammeng.
Inlawlawagna a gapu iti daytoy ket napukawan isuna ti puot pakairamanan ti kaduana a biktima a naitarayda iti ospital tapno mataming dagiti sinagabada a sugat.
Nupay kasta, inpalgakna a gapu iti nakana a sugat a sinagaba ni Curammeng ket pimmusay daytoy.
Kunana nga agpapan iti daytoy a gundaway ket nasakit ti sibubukel a bagina gapu iti pannakakurientena.
Naammoan a mapan koma isalakan ni Curammeng ni Bernabe gapu ta nakitana a nakadasay daytoy ngem isu metten ti napakaroan a nakuriente.
Innayonna nga awan met ti live wire iti nakapasamakan ti insidente isu a saanda a masinunuo no ayanno ti posible a nagtaudan ti pannakakurienteda.
Mainaig iti daytoy, nagturong ti News Team ti Bombo Radyo Laoag iti pagtaengan ti pimmusay a biktima ngem nagkedked ti pamiliada a nangipaay ti naan-anay a detalye maipapan iti napasamak.
Kuna ni Bernabe a kiniddawna iti Ilocos Norte Electric Cooperative wenno INEC iti panangkitada kadagiti linya ti kuriente iti lugarda tapno saanen a maulit pay ti nakaam-ames a pasamak.
Kabayatanna, saan a mamati ni Mrs. Ofelia Bernabe, akinkukua ti pagtaengan a nakapasamakan ti insidente a nakuriente dagiti biktima gapu ta awan met ti makitana a waya ti kuriente a mabalin nga isu ti nangitunda ti pannakakurienteda no di ket patienna a posible a nakimat dagiti biktima.
