LAOAG CITY – Manarimaanen a maus-usar dagiti dua nga oxygen plant iti Governor Roque Ablan Sr. Memorial Hospital ditoy siudad ti Laoag.
Segun ken ni Gov. Matthew Marcos Manotoc, maysa ket naestablisar idi 2019 idinto ti maysa ket idi 2023.
Inbatadna a babaen iti daytoy ket kabaelan ti nasao nga ospital ti makapartuat ti 10 a tangke ti oxygen iti kada oras.
Inlawlawagna a maipaayan ti umdas a suplay ti oxygen, saan laeng ti Provincial Hospital ngem pakairamanan dagiti dadduma pay a pampubliko nga ospital ditoy probinsia.
Kunana a kabaelan pay ti ospital ti aglako kadagiti pribado nga organisasion.
Malaksid iti daytoy, inpakaaammona nga adda ti infrastructure project ti Provincial Hospital pakairamanan ti Laboratory, Emergency Room, Salun-at Building, Medical Arts Building ken dadduma pay.
Kabayatanna, naammoan a dagitoy a proyekto ket para iti ad-adda pay a pannakapasayaat ti pannakaipadanon ti serbisio medikal kadagiti amin nga umili ditoy probinsia.
