LAOAG CITY – Saan a mailinged ti ragsak ni Abigail Laciste manipod iti Schools Division Office ti Laoag City kalpasan ti pannakagun-odna ti balitok a medalya iti Track and Field – Elementary Girls – Individual Category.
Segun kenkuana, nagbalin a naiget ti panagsanayda sakbay a simmabakda ti Region 1 Athletic Association Meet tapno maipasigurado a magun-od ti balligi kontra kadagiti pambato dagiti nagduduma nga Schools Division Office iti intero a rehion uno.
Inbatadna a saan a mailibak a nagbalin a narigat ti nagdalananda a panagsanay tapno ad-adda a maasa ti kinalaingda iti panagtaray.
Inlawlawagna a nagpaut ti tallo a bulan ti panagsanayda no sadino ditoy a nasursurona dagiti istratehia a nausarna iti nasao nga sports event.
Mainaig iti daytoy, kuna met ni Ma. Cristine Joy Taliente manipod iti Schools Division Office ti Laoag City a saanna a ninamnama a mangabak iti Track and Field – Elementary Girls – Individual Category ken makastrek iti Palarong Pambansa kalpasan a naiyawidna ti balitok a medalya.
Inbatadna a dandani pay a simmuko daytoy gapu iti panagdanagna ken panagbutengna kadagiti padana nga atleta a kabinnalubalna.
Innayonna a ti nagbalin nga inspirasionna ket ti pamiliana, trainers, coaches ken dagiti kakaduana nga umaayam.
Kabayatanna, naammoan a daytoyen ti maikadua a gundaway a makipaset da Laciste ken Taliente para iti Palarong Pambansa a maiyuswat inton sumaruno a tawen.
