LAOAG CITY – Dua nga establisimiento ti sinerrek dagiti saan pay a nabigbig a mannanakaw idiay Barangay Nalupta, Batac City.
Dagitoy ket ti Imelda’s Dry Goods and General Merchandise a kukua ni Joeben Libardo, agtawen ti 55, naasawaan, negosyante ken residente iti Barangay Cangrunaan iti ciudad ti Batac ken ti Uni Plus Cellphones and Accessories a kukua met ni Lianamy Tumbali Baligod, taga Barangay 1 ditoy ciudad ti Laoag.
Segun ken ni Libardo, naitaray dagiti mannanakaw iti pasdek da dagiti assorted clothes nga agbalor ti 30 ribo a pisos ken ti cash a 13 ribo a pisos.
Mamati ni Libardo nga ado dagiti nangserrek ti pasdek da gapu ta saan a kabaelan ti maymaysa wenno dudua a tao ti nangbagkat kadagiti tagilako da.
Kabayatanna, umabot met ti 101 units a cellphones, tablets ken dadduma pay a cellphone accessories iti cellphone shop ni Baligod ken mapatta-patta nga agbalor amin dagitoy iti 210 a ribo a pisos.
Agtultuloy ti imbestigasyon dagiti otoridad seknan ti nasao nga insidente.
