LAOAG CITY – Natay dagiti dua a lallaki kalpasan a nadesgrasya da ti nagluganan da a motorsiklo iti bypass road iti Brgy. Vira 55-C ditoy siudad ti Laoag.
Nabigbig dagiti biktima a da Benedic Ramos, agtawen 33, naasawaan ken residente ti Brgy. 18 San Isidro iti ili a Sarrat kenni Leobert Tabuyo, agtawen ti 32, naasawaan ken residente ti Brgy Sangil iti ili a Bacarra.
Segun ti PNP-Traffick Div. ti Laoag, dead on the spot idi nadanun da dagiti biktima iti nakadisgrasyaan da.
Nagsagaba dagiti dua ti narway a dunor kadagiti nagduduma a paset ti bagi da nangnangruna kadagiti ulo da a no sadino a ni Ramos ket naipurwak iti kataltalunan.
Mainaig iti daytoy, maladingitan ti pamilya Ramos kalpasan ti ipupusay ti maysa a miembro ti pamilya da gapu iti nasao a desgrasya.
Kuna ti maysa a kabagyan ni Ramos nga agub-ubra da iti maipatpatakder a balay iti Brgy. Sangil iti ili ti Bacarra.
Segun ti kayong ni Ramos, nabati ti kayong na iti nagiinoman da ken posible nga adda ti sabali a nagturungan na ket idi itulnog nan ni Tabuyo ket napasamak ti desgrasya.
Nakaro met a nadadael ti nagluganan da a motorsiklo gapu uray la naikat ti tangke ti gasolina ket uray ti headlight na.
Segun pay kadagiti pulis, posible a napataray da kas maibasar iti langa ti motorsiklo a nagluganan da ken nabartek dagitoy.
