BOMBO LAOAG – Natay ti maysa a lalaki idinto a nasugatan ti kadwa na kalpasan a naaksidente ti nagluganan da a traysikel iti bisinidad ti Barangay Cabangaran ken Salbang idiay Paoay, Ilocos Norte.
Nabigbig ti natay a ni Windel Gudoy, agtawen iti 38, dati nga OFW, idinto a ti nasugatan a kadwa na ket ni James Robinson Franco, addaan iti umno a tawen, naasawaan, agpada dagitoy a tricycle driver ken residente da iti Barangay Killing Sur iti ciudad ti Batac.
Iti imbestigasyon, bayat nga agpapalaud a direksyon ti nagluganan a traysikel dagiti biktima ket naikabil ti ligay na iti saan a sementado a paset ti kalsada a nakapukawan ni Gudoy ti kontrol a nagresulta ti pannakaidungpar da kadagiti signages ken iti maysa a kayo ti G-melina.
Naitaray dagiti dua iti Mariano Marcos Memorial Hospital and Medical Center iti ciudad ti Batac ngem naideklara a pimmusayen ni Gudoy gapu ti sinagaba na a nakana a sugat iti ulo na idinto a ni Franco ket nagsagaba met ti sugat iti ulo na ken ti nagduduma a paset ti bagina.
