LAOAG CITY – Inbatad ni Police Capt. Michael Permison, ti intel operation officer iti ciudad ti Batac a nakakumpiskar da iti 20 a bala ti kalibre 45 ken tallo a sachet a naglaon ti maipagarop a shabu a naikarga iti maysa a pouch iti inyuswat da a search warrant operation iti balay ti maysa a mannalon iti Brgy. Tabug iti nasao a ciudad.
Binigbig na ti subject ti operasyon a ni Stanley Bangkil y Bagayas, addaan iti umno a tawen, mannalon ken residente iti nasao a lugar.
Segun ken ni Permison, dagiti nakumpiskar da nga ebidensya ket nakita da iti pagiddaan ni Bangkil.
Malaksid kadagiti bala ti kalibre 45 a paltog ken tallo a sachet ti maipagarop a shabu ket adda pay ti naala da a kutsilyo.
Inbaga ni Permison a basar iti background investigation da ket adda ti ik-ikutan ni Bangkil a kalibre 45 a paltog nga awan ti lisensya na isut gapuna a nagaplikar da ti search warrant ken inyaplikar da a dagus.
Innayon na a basar pay iti imbetigasyon da ket tunggal makainom ti arak ti subject ti operasyon ket agkariar ken maipagarop nga ipakpakita na ti paltog na.
Inbaga ni Permison nga ipila da a dagus babaen it inquest ti kaso nga Illegal a possession of ammunition ken panagikot ti illegal a droga.
Sinungbatan met ni Permiso ti alegasyon ti pamilya Bangkil a sakbay a simmangpet dagiti kameng ti pulisya ket adda ti maysa a lalaki a nakaabungot a napan iti uneg ti balay nga isu ti atapen da a nagimula kadagiti nakumpiskar nga ebidensya kontra iti subject ti operasyon.
Kuna ni Permison a masapol nga adda ti pammaneknek ti pamilya Bangkil iti alegasyon da a ti ibagbaga da a nakaabungot a lalaki ti napan nangipan kadagiti nakumpiskar da a kontrabando.
Nagkedked metten a nagpainterview ti subject ti operasyon iti Bombo Radyo.
